♦ গোৱালপাৰা জিলাৰ কৃষ্ণাই কৃষি পামৰ পথাৰত আজি কঠীয়া সিঁচিলে জিলা কৃষি বিভাগে৷ ৰাষ্ট্ৰীয় কৃষি বিকাশ যোজনাৰ অধীনত ৰূপায়ণ হ’বলগীয়া এই আচঁনি খনৰ শুভাৰম্ভ কৰে বিধায়ক যাদৱ স্বৰ্গীয়াৰীয়ে এই উদ্দেশ্যে আজি কৃষ্ণাই কৃষিপামৰ পথাৰৰ আঠুৱনি বোকাত নামি পৰিল দুধনৈ বিধান সভা সমষ্টিৰ বিধায়ক যাদৱ স্বৰ্গীয়াৰীৰ লগতে জিলাখনৰ একাংশ কৃষি বিষয়া-কৰ্মচাৰী৷
উল্লেখ্য যে গোৱালপাৰা জিলাৰ উপৰি ৰাজ্যখনৰ অন্য জিলাৰ বানবিধ্বস্ত কৃষক সকলক সহায় কৰাৰ উদ্দ্যেশ্যে গোৱালপাৰা জিলা কৃষি বিভাগে কৃষ্ণাইৰ কৃষি পামত এই আচঁনি খন গ্ৰহণ কৰিছে৷ জিলা কৃষি বিষয়া প্ৰশান্তজিৎ বৰাই জানিবলৈ দিয়া মাতে, চলিত বাৰিষা কালৰ বানত জিলা খনৰ যি সকল কৃষকৰ কঠীয়া নষ্ট হ’ব সেই সকল কৃষকক সকাহ দিয়াৰ বাবে জিলা কৃষি বিভাগে এই ব্যৱস্থা গ্ৰহণ কৰিছে৷
অৱশ্যে বানত ক্ষতিগ্ৰস্ত অন্য জিলাৰ কৃষককো এই সুবিধা প্ৰদান কৰা হ’ব বুলি কৃষি বিষয়া গৰাকীয়ে মত ব্যক্ত কৰে৷ উল্লেখযোগ্য কৃষকৰ সুবিধাৰ বাবে আজি যি উন্নত মানৰ কঠীয়া সিঁচা হৈছে সেইবোৰ কঠীয়া পানীৰ তলত ১০/১৫ দিন থাকিলেও কোনো ক্ষতিসাধন নহয় আৰু এই কঠীয়াৰ দ্বাৰা কৃষক সকলে বিচৰা মতে উৎপাদন লাভ কৰিবলৈ সক্ষম হ’ব। আজিৰ এই অনুষ্ঠানত দুধনৈ বিধান সভা সমষ্টিৰ বিধায়ক যাদৱ স্বৰ্গীয়াৰীৰ লগতে জিলা কৃষি বিষয়া প্ৰশান্তজিৎ বৰা, দুধনৈ মহকুমা কৃষি বিষয়া অশোক শৰ্মা, কৃষ্ণাইৰ এডিঅ বন্দনা পাটগিৰি আদিকে ধৰি ভালে সংখ্যক লোক উপস্থিত থাকে৷
ssam
