গ্ৰেপ্তাৰ মানস চলিহাঃ আদালতত হাজিৰ, ৪ দিনৰ আৰক্ষীৰ জিম্মালৈ প্ৰেৰণ

♦প্ৰৱঞ্চনাৰ গোচৰত গ্ৰেপ্তাৰ হোৱা গোলাঘাটৰ যুৱক মানস চলিহাক দিছপুৰ আৰক্ষীয়ে কামৰূপ মহানগৰ জিলাৰ মুখ্য ন্যায়িক দণ্ডাধীশৰ আদালতত হাজিৰ কৰোৱাই। আৰক্ষীয়ে ১৪ দিনৰ বাবে জিম্মাত বিচাৰি আবেদন জনাইছিল যদিও আদালতে অভিযুক্তক ৪ দিনৰ বাবেহে দিছপুৰ আৰক্ষীৰ জিম্মালৈ প্ৰেৰণ কৰে। উল্লেখযোগ্য যে ধন ওভতাই নিদিয়া ঘটনা সন্দৰ্ভত এজন ব্যাৱসায়ীয়ে দিছপুৰ থানাত দাখিল কৰা এজাহাৰৰ ভিত্তিত ৰুজু হোৱা গোচৰৰ আধাৰত আৰক্ষীয়ে লোকজনক পশ্চিমবংগৰ এখন হোটেলৰ পৰা গ্রেপ্তাৰ কৰিছিল। ইফালে আলফা স্বাধীনৰ শিবিৰলৈ মানস বুঢ়াগোঁহাই এজন যুৱকক চোৰাংচোৱা সজাই প্ৰেৰণ কৰা ঘটনাত অভিযুক্ত মানস চলিহাৰ নাম সাঙোৰ খাই পৰিছিল। আলফা স্বাধীনৰ শিবিৰত বন্দী হোৱা মানস বুঢ়াগোঁহাই মানস চলিহাৰ বিষয়ে প্ৰথমে নাম প্ৰকাশ কৰিছিল৷