অ’ এন জি চিৰ কেতবোৰ বিভাগ আন ৰাজ্য তথা জিলালৈ স্থানান্তৰিত কৰাৰ লক্ষ্যৰে গুৰুত্বপূৰ্ণ সামগ্ৰী কঢ়িয়াই নিব বিচৰা সময়তে সৃষ্টি হয় উত্তেজনাময় পৰিৱেশ।
সামগ্ৰী সমূহ যাতে স্থানান্তৰিত কৰিব নোৱাৰে তাৰ বাবে জাতীয় সংগ্ৰামী সেনা অসম, আটাছুৰ একাংশ কৰ্মী উপস্থিত হৈ আবদ্ধ কৰি ৰাখে।
লক্ষ্যণীয় যে অ’ এন জি চিৰ কোনো গুৰুত্বপূৰ্ণ বিভাগ, লেব’টৰী যাতে আন জিলা বা ৰাজ্যলৈ স্থানান্তৰিত তাৰ দাবীত জাতীয় সংগঠন সমূহে বিভিন্ন সময়ত প্ৰতিবাদী কাৰ্যসূচী হাতত লৈছিল। শেহতীয়াকৈ অ’ এন জি চি কৰ্তৃপক্ষ আৰু প্ৰশাসনৰ সৈতে অনুষ্ঠিত হোৱা বৈঠকতো কোনো কাৰ্যালয় অনাগত দিনত শিৱসাগৰৰ পৰা স্থানান্তৰিত কৰা নহয় বুলি প্ৰতিশ্ৰুতি দিছিল।
কিন্তু ইয়াৰ পিছতো আজি গোপনে লেব’টৰী কেতবোৰ সামগ্ৰী স্থানান্তৰিত কৰিবলৈ চেষ্টা কৰাৰ সময়তে আবদ্ধ কৰে জাতীয় সংগঠন সমূহে। পিছত সামগ্ৰী কঢ়িয়াই নিয়াটো স্থগিত ৰখা হ’ব বুলি আশ্বাস দিয়ে সংশ্লিষ্ট বিষয়ববীয়াই। ইপিনে কোনো কাৰণতে শিৱসাগৰৰ পৰা অ’ এন জি চিৰ বিভাগ, লেব’টৰী স্থানান্তৰিত কৰিবলৈ দিয়া নহ’ব বুলি স্পষ্ট কৰি দিয়ে জাতীয় সংগ্ৰামী সেনা অসম আৰু আটাছুৱে।
