কাজি নেমুক ৰাজ্যিক ফল হিচাপে ঘোষণা

অসম চৰকাৰে কাজি নেমুক ৰাজ্যিক ফল হিচাপে ঘোষণা কৰিছে। ৰাজ্যিক কেবিনেটে কালি কাজি নেমুক ৰাজ্যিক ফল হিচাপে স্বীকৃতি প্ৰদানৰ প্ৰস্তাৱত অনুমোদন জনাইছিল যদিও কৃষিমন্ত্ৰী অতুল বৰাই আজি বিধানসভাত এই বিষয়ে আনুষ্ঠানিকভাৱে ঘোষণা কৰে। কাজি নেমুৱে ২০১৯ চনত জি আই টেগ লাভ কৰিছিল আৰু এই ফলবিধ অকল অসমতে উপলভ্য। বিধায়ক নিজানুৰ ৰহমানৰ এটা প্ৰশ্নৰ উত্তৰত পঞ্চায়ত আৰু গ্ৰামোন্নয়ন মন্ত্ৰী ৰঞ্জিত কুমাৰ দাসে কয় যে, চৰকাৰে গাঁও পঞ্চায়তৰ বিধানসভা সমষ্টিৰ সীমা পুনৰ নিৰ্ধাৰণৰ ভিত্তিত গাঁও পঞ্চায়তসমূহৰ পুনৰ গঠনৰ বিষয়ে বিবেচনা কৰি আছে আৰু এই সন্দৰ্ভত কাম অব্যাহত আছে। বিজেপিৰ বিধায়ক বিদ্যাসিং ইংলেঙৰ এটা প্ৰশ্নৰ উত্তৰত খাদ্য আৰু অসামৰিক যোগান তথা গ্ৰাহক পৰিক্ৰমা মন্ত্ৰী ৰঞ্জিত কুমাৰ দাসে কয় যে, চৰকাৰে অকল নিমখৰ বাবেহে অনুজ্ঞাপত্ৰ প্ৰদান কৰে। তেওঁ লগতে কয় যে, অন্য অত্যাৱশ্যকীয় সামগ্রীসমূহ মুকলি বজাৰৰ জৰিয়তে কিনা-বেচা হয় আৰু সেইসমূহৰ ওপৰত চৰকাৰৰ কোনো নিয়ন্ত্ৰণ নাথাকে।