■ ৰঙাপৰা সমষ্টিত বিজেপি আৰু কংগ্ৰেছ দলে নির্বাচনী প্ৰচাৰেৰে ভোটাৰ ৰাইজক আকৰ্ষিত কৰাৰ অন্তিম চেষ্টা
● ৰঙাপৰাঃ প্ৰথম পৰ্য্যায়ৰ নিৰ্বাচনৰ প্ৰচাৰ আৰু ক্ষন্তেক সময়ৰ পিছত অন্ত পৰিব। অসমৰ ৪৭ টা সমষ্টিত হ’ব লগা এই নিৰ্বাচনী প্ৰচাৰত নামি পৰিল নিজৰ নিজৰ দলৰ মনোনীত প্ৰাৰ্থী সকল। প্ৰথম পৰ্য্যায়ৰ নিৰ্বাচনৰ অন্তিম দিনা ৭৪ নং ৰঙাপৰা বিধান সভা সমষ্টিত বিজেপি দল আৰু কংগ্ৰেছ দলে নির্বাচনী প্ৰচাৰেৰে ভোটাৰ ৰাইজক আকৰ্ষিত কৰাৰ অন্তিম চেষ্টা কৰা পৰিলক্ষিত হয়।
প্ৰথম পৰ্য্যায় নিৰ্বাচনৰ আজি অন্তিম দিনটোত বিজেপি প্ৰাৰ্থী কৃষ্ণকমল তাঁতীয়ে সমৰ্থকক লগত লৈ সমগ্ৰ ৰঙাপৰা নগৰত এক বিশাল পদযাত্ৰা কৰে। সাংবাদিকে সোধা প্ৰশ্নৰ উত্তৰত কৃষ্ণ কমল তাতীঁয়ে জানিবলৈ দিয়ে যে, জনতাৰ উল্লাস চাই আজি এনেকুৱা লাগিছে যে কংগ্ৰেছ একেবাৰে উৎখাত হৈ যাব আৰু ৰঙাপৰা সমষ্টিত বিজেপিৰ বিজয় নিশ্চিত।
লগতে কয় যে মই এজন বিধায়কতকৈ এজন ভাল প্ৰতিনিধি হ’ব বিচাৰো।
আনফালে কংগ্ৰেছ দলৰ মনোনীত প্ৰাৰ্থী অভিজিৎ হাজৰিকাও সমষ্টিটোৰ বিভিন্ন অঞ্চল পৰিভ্ৰমণ কৰি তীব্ৰ প্ৰচাৰ চলাই। কংগ্ৰেছ দলৰ প্ৰাৰ্থী গৰাকীয়ে সাংবাদিকৰ লগত মত বিনিময়ত কয় যে মোতকৈ ৰাইজেহে মোৰহৈ বেছি প্ৰচাৰ চলাইছে গতিকে প্ৰমাণ হৈছে যে এইবাৰ ৰাইজে কংগ্ৰেছ দলক ৰঙাপৰা সমষ্টিত বিচাৰিছে আৰু জিকাবই।
প্ৰাৰ্থী গৰাকীয়ে কয় যে, বিজেপি দলে ৰাইজক দিয়া মিছা প্ৰতিশ্ৰুতিবোৰৰ উচিত প্রত্যুত্তৰ দিবলৈ ৰঙাপৰাৰ ৰাইজ ৰৈ আছে।
