গুৱাহাটীঃ পূৰ্ৱোত্তৰ জনজাতি শিক্ষা সমিতিৰ এক উপ সমিতি কৃষ্ণচন্দ্ৰ গান্ধী ফাউণ্ডেচনে জনজাতীয় গৌৰৱ দিৱস হিচাপে বীৰছা মুণ্ডা জয়ন্তীৰ আয়োজন কৰি জনজাতীয় গৌৰৱ সন্মান অনুষ্ঠানৰ আয়োজন কৰে। এই উপলক্ষে বিখ্যাত শিল্পী বাবা সত্যনাৰায়ণ মৌৰ্য আৰু বিদ্যা ভাৰতীৰ সৰ্বভাৰতীয় সাধাৰণ সম্পাদক অৱনীশ ভাটনগৰ, অৰুণাচল প্ৰদেশৰ আবুতানি বিদ্যা নিকেতনৰ জ্যেষ্ঠ শিক্ষয়িত্ৰী য়ান্যা কাৰ্লো আৰু কাৰ্বি আংলঙৰ একল বিদ্যালয়ৰ কামত উৎসৰ্গিত কান্তি বড়োক জনজাতীয় গৌৰৱ সন্মানেৰে সন্মানিত কৰা হয়। সন্মানৰ চিন স্বৰূপে দুয়োকে এটকোটাকৈ স্মৃতি চিহ্ন, ২৫ হাজাৰ টকাকৈ ধনৰ লগতে অংগবস্ত্ৰ প্ৰদান কৰা হয়। শিশু শিক্ষা সমিতি উত্তৰ অসম প্ৰান্তৰ প্ৰচাৰ প্ৰমুখ মুকুটেশ্বৰ গোস্বামীয়ে আজি গুৱাহাটীত জানিবলৈ দিয়া মতে হোজাই গীতাশ্ৰমত
কৃষ্ণচন্দ্ৰ গান্ধী ফাউণ্ডেচনৰ তৰফৰপৰা পৰা এই বঁটা প্ৰদান কৰা হয়। ইয়াৰ পিছতেই কৃষ্ণচন্দ্ৰ ফাউণ্ডেশ্যনৰ বিষয়ে তথ্য প্ৰদান কৰি সম্পাদক সমৰীণ ডেকাই কয় যে এইবাৰ সংগঠনটোৱে অৰুণাচল, মেঘালয়, অসম আদি ৰাজ্যৰ বিদ্যালয়সমূহলৈ বাদ্যযন্ত্ৰ আৰু ঘোষবাদ্য যোগান ধৰাৰ লগতে মণিপুৰৰ শিক্ষাৰ পৰা বঞ্চিত ছাত্ৰ-ছাত্ৰীসকলকো আৰ্থিক সাহায্য প্ৰদান কৰিছে। সম্পাদক সমৰীণ ডেকাই ঘোষণা কৰে যে অহা বছৰৰ পৰা জনজাতীয় গৌৰৱ দিৱস উপলক্ষে ফাউণ্ডেচনৰ দ্বাৰা ৫ জন লোকক সম্বৰ্ধনা জনোৱা হ’ব।
এই উপলক্ষে ফাউণ্ডেশ্যনৰ সভাপতি দীপ জ্যোতি ৰাজখোৱাও উপস্থিত থাকে। সৰ্বভাৰতীয় মন্ত্ৰী ব্ৰহ্মজী ৰাৱে কয় যে দুয়োগৰাকী কাৰ্যকৰ্তাই মৌন সাধকৰ দৰে সমাজৰ উত্থানৰ হকে কাম কৰি আছে।
