নামনি অসমত সক্ৰিয় গাড়ী চুৰি চক্ৰঃবৰপেটা ৰোডৰ চুৰি বলেৰ’ জব্দ কৃষ্ণাইতঃ ধৃত দুই গাড়ী চোৰ

♦কৃষ্ণাইৰ পৰা কন্দৰ্প কুমাৰ দেৱ নাথঃ কৰ’না মহামাৰীৰ আতংকৰ গইনা লৈ নামনি অসমত পুণৰ সক্ৰিয় হৈ উঠিছে গাড়ী চুৰি চক্ৰ৷ আজি পুৱা গোৱালপাৰা জিলাৰ কৃষ্ণাইত দুখন গাড়ীসহ দুটা চোৰ কৰায়ত্ত হোৱাৰ পিছতে পোহৰলৈ আহে এই ভয়ংকৰ তথ্য৷ কৃষ্ণাই আৰক্ষীয়ে আজি জব্দ কৰা গাড়ী দুখনৰ নম্বৰ হৈছে এ এছ ১৫ এ চি ১২০৭ আৰু এ এছ ১৫ এ চি ০৫৯১৷ দুয়োখনেই বলেৰ’ পিক আপ গাড়ী৷ আনহাতে ধৃত চোৰ দুটাৰ ঘৰ বৰপেটা জিলাৰ কয়াকুছিত৷ আৰক্ষী সূত্ৰে জানিব পৰা মতে, চুৰি গাড়ী দুখন হৈছে বৰপেটা ৰোডৰ মায়া প্ৰডাক্টচৰ স্বত্ত্বাধিকাৰী গোপাল আগৰৱালাৰ মাল কঢ়িওৱা বাহন৷ জানিব পৰা মতে, যোৱা মাজ নিশা সংঘটিত হোৱা চুৰি কাণ্ডৰ বিষয়ে আজি পুৱাহে অৱগত হয় গাড়ীৰ গৰাকীয়ে৷ তাৰ পিছতে তেওঁ বৰপেটাৰোডৰ আৰক্ষীৰ কাষ চাপে আৰু গাড়ীত থকা জিপিএছৰ জৰিয়তে বৰপেটাৰোডৰ আৰক্ষীয়ে কৃষ্ণাই আৰক্ষীৰ সহযোগত আজি পুৱা কৃষ্ণাই বেইলী দলঙৰ ওপৰত গাড়ী দুখন জব্দ কৰিবলৈ সক্ষম হয়৷ আৰক্ষীয়ে ঘটনাৰ তদন্ত অব্যাহত ৰাখিছে৷