● শোণিতপুৰ জিলাৰ এগৰাকী বিশিষ্ট শিক্ষাবিদ, সমাজকৰ্মী তথা বিভিন্ন অনুষ্ঠান-প্ৰতিষ্ঠানৰ সৈতে জড়িত থকা হেমন্ত কুমাৰ বৰুৱাৰ (৫৯) আজি মৃত্যু ঘটাত সমগ্ৰ জিলাখনতে শোকৰ ছাঁ পৰিছে।
ঢেকীয়াজুলি লোকনায়ক অমিয় কুমাৰ দাস মহাবিদ্যালয়ৰ শিক্ষা বিভাগৰ মুৰব্বী অধ্যাপক, তেজপুৰ সাহিত্য সভাৰ প্ৰাক্তন সভাপতি, তেজপুৰ বান থিয়েটাৰৰ প্ৰাক্তন সম্পাদক, তেজপুৰ জ্যোতিকলা সংগীত মহাবিদ্যালয় পৰিচালনা সমিতিৰ সভাপতি, অসম কলেজ শিক্ষক সংস্থাৰ কেন্দ্ৰীয় সদস্য, আলোচনী সম্পাদক, সাদিনীয়া সংবাদ পত্ৰৰ সহকাৰী সম্পাদক, তেজপুৰ পৌৰসভাৰ ১৮ নং ৱাৰ্ডৰ প্ৰাক্তন সদস্য, অসম আন্দোলনৰ সক্ৰিয় সদস্য, শোণিতপুৰ বিদ্যাপীঠ পৰিচালনা সমিতিৰ সভাপতি, বিশিষ্ট সাহিত্যিক, শিক্ষাবিদ গৰাকীৰ মৃত্যুত ৰঙাপৰা প্ৰেছ ক্লাৱে গভীৰ শোক প্ৰকাশ জনাইছে।
ৰঙাপৰা প্ৰেছ ক্লাৱৰ সভাপতি পংকজ নাথ, সম্পাদক শশী ভুষণ শৰ্মাকে ধৰি সমূহ সদস্য বৃন্দই তেখেতৰ আত্মাৰ চিৰশান্তি কামনা কৰাৰ লগতে শোক সন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে।
কৰ্মজীৱন শেষ নহওঁতে স্বৰ্গগামী হোৱা হেমন্ত কুমাৰ বৰুৱাৰ মৃত্যুত তেজপুৰ জিলা কৰ্মচাৰী পৰিষদ আৰু তেজপুৰ জিলা হাইস্কুল শিক্ষক সংস্থায়ে গভীৰ শোক কৰিছে।
