♦ ৰঙিয়াৰ পৰা চৈয়দ মোস্তাফা আহমেদ, অসম খবৰঃ
ৰঙিয়া মহকুমাৰ অন্তৰ্গত হেমদোল গাঁওত বিজুলী বিভাগৰ দায়িত্বজ্ঞানহীনতা পুনৰবাৰ উন্মোচিত হৈছে। বাসগৃহৰ ওপৰেদি যোগান ধৰিছে সক্ৰিয় বিদ্যুৎ পৰিবাহী তাঁৰ। বিদ্যুৎ বিভাগৰ ৰঙিয়া ২ নং বৈদ্যুতিক উপ-সংমণ্ডলৰ চূড়ান্ত দায়িত্বহীনতা আৰু গাফিলতিৰ বাবেই অঞ্চলবাসীয়ে ভয় আৰু শংকাৰ মাজেৰে দিন অতিবাহিত কৰিব লগীয়া হৈছে।
বিজুলী পোষ্ট সমুহৰ উচ্চতা মাত্ৰ দহ বাৰ ফুটমান হোৱাৰ ফলত পথটোৰে নিতৌ অহা-যোৱা কৰা পথচাৰিৰ গাত উক্ত বিদ্যুত পৰিবাহী তাৰ লাগি যিকোনো মুহুৰ্ততে দুৰ্ঘটনা সংঘটিত হোৱাৰ তীব্ৰ আশংকাই দেখা দিছে। কিন্তু বিভাগীয় কৰ্তৃপক্ষ ইমানৰ পিচতো যেন ঘোৰ নিদ্ৰাত।
স্থানীয় ৰাইজে অভিযোগ কৰা মতে বহুবাৰ বিভাগীয় কাৰ্যালয়ক অৱগত কৰিছে যদিও আজিলৈকে কোনো ব্যৱস্থা কৰাৰ কথা বাদেই, ঠাইডোখৰত উপস্থিতেই নহ’ল এজনো বিষয়া কৰ্মচাৰী। যদিহে কিবা অঘটন হয় অকৰ্মণ্য বিদ্যুৎ বিভাগটো সম্পূৰ্ণ দায়ী হʼব বুলি ৰাইজে জনাই।
